АСА ҚҰРМЕТТІ
АҢСАР ТҰРСЫНХАНҰЛЫ!

Сіздің БАҚ өкілдеріне, оның ішінде жергілікті газет қызметкерлеріне жасап жатқан ағалық қамқорлығыңыз ұшан-теңіз. Қазақстан Республикасының 2011 жылғы наурыз айындағы «Мүлік туралы» Заңына байланысты аудандық газеттерді 100 пайыз мемлекеттік жасаймын деген ұсынысыңызды біз қуана қабылдадық. Дей тұрғанмен облыстық «Жетісу» теле-радио корпорациясының, яғни «Жетісу» медиахолдинг құрамына филиал ретінде кіретініміз көңілге кірбің ұялатып отыр. Филиал болып қалсақ, түбінде облыстық газеттердің жәй ғана бөлімшесі ретінде қалатын сияқтымыз. Өзіміздің есеп-шотымыз, бухгалтериямыз да бір жерге орталықтандырылатын сияқты.
Өйткені, өткен жылдың 27 желтоқсанында облыс әкімінің орынбасары Болат Долдайұлы Тәкеновтің төрағалық етуімен бұқаралық-ақпарат құралдары басшыларының жиналысында облыстық қаржы басқармасының бастығы Сырым Қасымов мырза «Аудандық газетті жою туралы» қаулы қабылдап, олардың құрал-жабдықтарын облыстық «Медиахолдингке» өткізу жөнінде айтқан еді. «Жою туралы» қаулының шығатындығының өзі де бізді шошытып отыр.
Олай болса, аудандық газеттердің жабылып қалуы да мүмкін. Қылышынан қан тамған Кеңес Одағы кезінде әр ауданның өз газеті болған, енді Тәуелсіздігіміздің 20 жылдығын тойлаған мына егеменді заманда аудандық газеттер күш-қуаты, материалдық жағдайы жоқ қауқарсыз бөлімше болып қала ма, деген сұрақ бізді қатты мазалайды.
Қазірдің өзінде облыстық «Жетісу» теле-радио корпорациясының басшылығы мен бухгалтериясы «Газет ғимаратын, дүние-мүлкін тез арада бізге өткізіңдер»; - деп айтып жатыр. Олар «Шаш ал десе, бас алғалы» отыр. Оның соңы бізді шын мәнінде жойып жіберуге әкеле ме деген қауіп бар.
Сондықтан, Сізден өтінеріміз «Огни Алатау» газетінің 2012 жылдың 7 қаңтардағы №3 (16508) санының 10 бетінде жарияланған Талдықорған қаласы әкімінің 2011 жылдың 14 желтоқсанындағы №32-1268 А «ГГКП на ПВХ «Газета «Талдыкорган» аппарат акима г. Талдыкоргана реорганизовывается путем преобразование в ТОО «Газета «Талдықорған таңы» атты қаулысының негізінде аудандық газеттерді де ЖШС етіп қайта құруға мүмкіндік жасасаңыз екен деген тілегіміз бар.

Үлкен үмітпен аудандық басылымдар атынан
«Заман жаршысы» газетінің бас редакторы
Өтесін ҚҰБИЕВ.
«Атамекен» газетінің бас редакторы Есенқұл ЖАҚЫПБЕКОВ,
«Іле таңы» газетінің бас редакторы Роза АЙДАРБЕКОВА,
«Талғар» газетінің бас редакторы Райхан ӘЗІМОВА,
«Жаркен өңірі» газетінің бас редакторы Бағдат АЙТМУХАЕВА.

Алматы облысының әкімдігі 2011 жылғы 1 наурыздағы ҚР «Мемлекеттік мүлік туралы» Заң талаптарын орындау мақсатында «Медиахолдинг Жетісу Ақпарат» акционерлік қоғамын құру (жарғылық капиталында 100% мемлекеттің құзырында) жұмыстарын жүргізу үстінде.
Қазіргі кезде аудан және қалалық газеттер қайта құрылып, «Медиахолдинг Жетісу Ақпарат» акционерлік қоғамына кіреді.
Бұл жөнінде Сіз өзіңіз де қатысқан жиналыстарда бірнеше рет айтылған болатын.
Аудан және қалалық газеттер өздерінің меншік нысанына қарамастан, жарыққа шығуын тоқтатпайды.
Жоғарыдағыны ескеріп, бүгінгі таңдағы туындап отырған жағдайларға Сізді түсіністікпен қарайды деп сенім артамын.